ద్రావిడులుగా దసరా దీపావళిని గురించి ఆలోచించండి..

ద్రావిడులపై ఆధిపత్యం సంపాదించే క్రమంలో నాటి ఆర్యులు ద్రవిడులను, రాక్షసులుగా చిత్రీకరించి వారిపై విజయం సాధించడానికి అనేక మోసపూరిత కుట్రలు సాగించి, తమ ఆడవాళ్ళను ప్రయోగించి విజయాలు సాధించి పండుగలు చేసుకున్నారు. ఆ పండుగలను మనపై రుద్ది వాటిని మన సంస్కృతిలో భాగంగా కల్పించి బలవంతంగా మనపై ప్రయోగించారు. ఆర్యులు తమ దేశదిమ్మరితనంతో భారత ఉపఖండంలో ప్రవేశించి తమకున్న అశ్వసంపదను, విల్లంబుల బలంతో ఇక్కడి స్థానిక రాజ్యాలపై దాడులు చేస్తూ తమ ఆధిపత్యాన్ని నిరూపించుకుంటు ఇక్కడి వారిని రాక్షసులుగా చిత్రీకరించి తమకు తాము దేవతలుగా ఊహించుకొని పురాణాలు సృష్టించుకున్నారు. వాళ్ళు ఈ భూభాగంపై ప్రవేశించే నాటికి ఇక్కడ నగరాలు నిర్మించబడి, నాగరికతతో, శతృ దుర్బేద్యంగా వున్న రాజ్యాలు విలసిల్లాయనడానికి పురాణాలలో వర్ణించబడ్డ రావణాసురిడి లంకా పట్టణం, బలిచక్రవర్తి కేరళ రాజ్యం, హిరణ్యాక్షుడి రాజ్యాల వర్ణణలు చూస్తే అర్థమవుతుంది. తమకు లేని ఈ నాగరికత, సంపదలను హరించి ఇక్కడి మట్టిమనుషులను అసురులుగాను, తమను సురులుగా మార్చుకున్నారు. మనపై విజయాలను సాధించడానికి ఎన్ని కుయుక్తులు పన్నారో, కుట్రలు చేసి గెలిచారో వారి గాధలలోనే తెలుస్తోంది. కావున ద్రావిడ చక్రవర్తులైన రావణబ్రహ్మ, మహిషులపై వారి మోసపూరిత విజయాలకు చిహ్నంగా నిలిచిన ఈ దసరాను, నరకచక్రవర్తిపై తమ భార్యను ప్రయోగించి గెలిచినందుకు చేసుకుంటున్న దీపావళిల పట్ల ద్రావిడులుగా, దళితులుగా ఈ నేల మట్టిమనుషులుగా ఆలోచించాల్సిన అవసరముంది. మనవి కాని పండగలను మనం బహిష్కరిద్దాం. బతుకమ్మలను, పైడితల్లమ్మలను కొలుద్దాం..